China economy-in hma a sawn

Covid-19 hri leng vangin China economy tlahniam chuan ṭhat lam a pan leh ṭan tawh a, kumin 3rd quarter July-September thla chhunga China Gross Domestic Product (GDP) punna chu 4.9% a ni.

Quarter hmasaa (April-May) China GDP (ramchhunga an thilsiam chhuah leh thar chhuah) punna hi 3.2% chauh a ni a, 1st quarter (January-March) phei chu -6.8% a ni. Nikum 3rd quarter-a China GDP kha 6.2% a ni a, nikum nena khaikhin chuan khawvela ram economy lian ber dawttu China hian hri leng a tuar  nasa hle tih a hriat theih.

Ramdang nena insumdawnna kawngah pawh China hi a tlahniam hman a, mahse tunah chuan a rawn ziaawm chho leh tawh a ni. Kumin January-March thla khan ram pawna an thil thawn chhuahna a tlahniam hle a, September thla khan 9.9% ah a kai chho leh tawh a ni. Ramdang aṭanga an lakluh pawh hri leng vang bawkin a tlahniam a, September thla khan 13.2%-ah a pungchho ve bawk.

Kumin kum tir lam khan China fixed-asset investment chu -24.5% a ni hman a, August thla thleng khan -% a ni zel a, mahse September thla aṭang khan 0.8% a rawn ni chho thei ta bawk a ni. Kumin kumtir lam thla thum chhung khan China economy tlakhniamna chu 6.8% a ni. Hei hi hri leng vanga ram puma lockdown (inkharkhip) an hman vanga ramchhunga sumdawnna leh thilsiamchhuahnate an chawlh lailawk  vang a ni.