Pakistan PM bang turin an phut
Pakistan prime minister Imran Khan chu kum 2018-a an ram inthlanpui neihah khan vote tichingpen leh inthlan kaihhnawiha thil dik lo tia puhin, Pathianni khan eptu pawlte chuan Karachi-ah kawng an zawh a, PM chu bang turin an phut.
September thla khan eptu pawl intelkhawm, Pakistan Democratic Movement (PDM)-te hian PM hi bang tura phutin nawrh an lo huaihawt tawh bawk.
Eptute chuan PM Khan hi Covid-19 hri leng chungchanga a hmalakna an sawisel bawk a, an rama thil man sang nasa lutuk vangte, an economy chu a hmasawn lo zawng hlira a kal avangin a kaihhruai sorkar chu ram enkawl thiam loah an puh bawk a ni.
PDM hian thla hlui khan Khan hi PM aṭanga ban a nih theih nan Parliament-ah no-confidence motion put luh an tum thu leh, MP nihna aṭanga a ruala banna thehluh an tum thu an lo sawi tawh a ni.
Pakistan rama democracy chawinun a nih theih nan te, Pakistan mite hnenah an zalenna, dikna leh an chanvote pek let a nih theih nana ruahmanna an siam thu PDM chuan an sawi.