IS-in Boko Haram thawhpui tura ngenna a pawm

Islamic State (IS) firfiak pawl chuan Nigeria helpawl, Boko Haram in an thlawp thu leh, thawhpui tura a ngenna a pawm.

IS hian audio message tichhuakin, hetah hian IS thupuangtu chuan Boko Haram-te ngenna chu an pawm thu leh, Islam ram din tura an beihna chu West Africa lamah an huang an zauh dawn tih a sawi.

Kar hmasa khan Boko Haram hian IS zawm a, thawhpui an duhna thuchah an lo tichhuak tawh a ni. Boko Haram helpawl hi kum 2009 aṭang khan Nigeria hmarchhak lama Islam state din tumin an lo hel tawh a, Nigeria sipaite nen an inbeih reng bakah, an buaina hian an ram ṭhenawmte pawh a kangkai tawh a ni.

IS audio message tihchhuah hian IS thupuangtu hian Mohammed al-Adnani a nih thu a sawi a, “Muslim-te chu West Africa-a Boko Haram pawlte chu zawm tura sawmin, Iraq sipai leh US kaihhruai ṭangrual pawlte’n tun hnaia Iraq leh Syria rama IS nena an inbeihnaa hnehna an chang chho zel nia an sawi pawh an pawm lo tih a sawi bawk. IS hian North Africa leh Arabian Peninsula-a helpawl dang­te pawh an thlunzawm tawh bawk.

Nikum November thla khan IS hotu, Abu-Bakr al-Baghdadi chuan Egypt, Libya, Algeria, Yemen leh Saudi Arabia-a Islam firfiak pawlte’n thawhpuia an sawmna a pawm tawh a ni.

IS hian nikum chhung khan Iraq leh Syria-ah ram zau tak an la a, Iraq-a khawpui pawimawh tak pahnih Tikrit leh Mosul chu an kutah a la awm mek a ni.

Hetihlai hian firfiak­te kut aṭanga Tikrit khawpui lak let tumin Iraq sipaite chuan beihpui an thlak mek a, hma pawh an sawn zel tih an sawi. Iraq sipaite hi Tikrit khawpui chhungah an lut tawh a, khawpuia firfiak awm zing eng emaw zat chu an tlanchhe tawh a ni.

Iraq sipai leh IS te hi Tikrit local government compound bul, President hlui Saddam Hussein-a chenna ṭhin in bulah an inkap mek a, sipai helicopter hmangin firfiakte bihrukna hmunte bomb a ni bawk. Firfiakte hi an dang chep sawt hle a, an inpek loh chuan sipaite kuta thih mai an hma bak tawh nia sawi a ni.