Israel PM-in Zionist Union Thawhpui a tum lo

Israel Prime Minister Benjamin Netanyahu chuan March 17-a an ram inthlanpui neih turah center-left Zionist Union nena ṭangrual sorkar siam chu a duh dawn lo tih a sawi.

Mipui ngaihdan lak hnuhnung berah Zionist Union hian Netanyahu-a party Likud party khumin hma a hruai mek a ni.

Channel 2 news in a kawmnaah, Netanyahu chuan prime minister a nih leh loh chuan thil hlauhthawnawm tak a awm a ni a ti. Isaac Herzog-a kaihhruai Zionist Union nena an thawhdun chuan prime minister chanvo hi an inchan chhawk a ngai dawn a, hei vang hian thawhpui a tum lo tih a sawi.

“Kawng hnih thlan tur a awm. Prime minister hna in thawh chhawk ang chi hi kan thlen tir tur a ni lo,” a ti.

Khawsak phung hautak chho zel chung­changa mipuite harsatna neih chu chingfel turin an hmalakna chu ala tawk lo tih a phat loh thu PM chuan a sawi a, prime minister atana thlan nawn leh a nih chuan mipuite harsatna sutkiansak turin an thawk chhunzawm zel dawn tih a sawi.

Netanyahu chuan Zionist Unoin chu thlan tlin an nih chuan sorkar policy-te nasa takin an thlak dang­lam dawn a, hei hi Israel tan a him dawn lo a ni, a ti. Hei vang hian mipuite chu Likud party thlang tling leh turin a ngen nghal.