Thailand police-in media outlet chhuina tur thupek tichhuak

Thailand police-te chuan an rama emergency puan a ni chunga kar liam taa sorkar duh lohna lantira nawrh huaihawt lui cover-tu, media outlet pali chhui chianna tur thupek a tichhuak. 

Police-te thupek tihchhuah hi media group hrang hrang chuan na takin an sawisel nghal a, prime minister Prayuth Chan-ocha kaihhruai sorkar chu media mite zalenna beiah an puh. 

Thupek tihchhuahah hian police-te chuan media outlet pali-te bakah hian nawrh huaihawtten Facebook page an siam pawh chhui chian a ni dawn tih an tarlang. 

Police thupuangtu Kissana Phatanacharoen chuan inte­lligence unit aṭangin  thu dik tawk lo, mipuite tichiai leh buaina chawk chhuak thei thu thehdarh a ni tih an dawng niin a sawi. Hei vang hian broadcast regulator leh digital ministry-in chhui chiangin, a ṭul angin action an la dawn tih a sawi a, press freedom rahbeh tumna a ni lo, a ti. 

Digital ministry thupuangtu, Putchapong Nodthaisong chuan media outlet pali leh Facebook page-a thu ziakte chu la thla tura ngen an nih thu leh, dan an bawhchhia niin a sawi a ni. 

Zirlaite huaihawta PM Prayuth Chon-ocha bang tur leh, Thailand lal thuneihna tihnepna tura ram danpui siamṭhat phuta hun rei tak nawrh huaihawt a nih hnuah kar liamta Ningani khan sorkar chuan state of emergency a puang a ni. Emergency dan hnuaiah hian mi panga ai tam punkhawm khap a nih bakah, print leh online hmanga ram security tichhe thei thuchhuah te khap a ni. Mahse nawrh huaihawtte hian emergency puan ni mah se pungkhawmin nawrh hi an  huaihawt chhunzawm zel a, nitin lungawi lohna lantir zel an tum tih an sawi. 

Prime Minister Prayuth chuan nawrh huai­hawtten bang turin phut mah se PM a nihna aṭangin a bang dawn lo tih a sawi a, an ram dinhmun sawiho tura special Parliament session koh a thlawp thu a sawi. Mahse Parliament-ah hian PM thlawptu lam hian majority an neih avangin special session koh ni mah se, eptu lam thil phut erawh a tlang a rinawm loh hle thung.