Vatican-in sipai chakna hmanga IS beih a thlawp

Vatican chuan Islamic State (IS) firfiak pawl­in Kristian leh Middle East-a hnam tlem zawkte an beih ṭhin chu chinfel dan kawng hriat a nih si loh chuan sipai chakna hmanga beih mai a thlawp.

Vatican top diplomat, Archbishop Silvano Tomasi chuan Islam fir­fiakte chuan mi tam tak an ti­hlum tawh a, hei hi tihtawp a ngai tawh a ni, a ti.

Middle East-a buaina chhuak ṭhinah sipai chakna hmanga chinfel tum hi

Vatican chuan a thlawp ngai lo. February thlaa Libya rama IS-in Egyptian Coptic Kristian 21 te lu an tansak kha Pope Francis chu na taka a dem thu a lo sawi tawh a ni. Firfiakte'n Syria leh Iraq ram ṭhenkhat an lak hnuah, an ram lak china Kristian tam tak chu hmun him lamah an tlan­chhe tawh a ni.

Archbishop Tomasi chuan, "Tharum tello, rua­hmanna leh thawhhona fel tak hnuaia Islam firfiakte pawikhawihna thlen ṭhin tihtawp dan kawng zawn hi a pawimawh. Mahse hei hi a theih loh a nih chuan sipai chakna hman mai chu a ngai a ni," a ti.

"Firfiakten mi tam tak an tihlum ṭhin hi kan dan a ngai tawh a ni. Chuti a nih loh chuan nakinah engvangin hetiang thil hi kan thlentir tiin kan la sawi ngei ang," a ti.

Hetihlai hian US intelligence agency CIA chuan IS hian ralthuam a neih ṭhat avang leh, sum lama a hnianghnar avang­in awlsam taka nuai chimih mai theih an nih loh tur thu a sawi. Hemi rual hian

IS hi an nuai chimit a nih loh chuan Iraq leh Syria chauh ni loin ram dang, US tan pawhin pawl hnawksak tak an la ni thei dawn tih a sawi.