Thlipui tuartu Vanuatu-in ṭanpuina a dil

Vanuatu thliarkarah thlipui, Cyclonce Pam a tleh vangin mi 40 chuang an thi a, thil tam tak a tichhe tel bawk.

Pacific tuifinriat chhim lama awm, Vanua­tu thliarkarah hian kar kalta Inrinni khan Cyclone Pam hi darkar khata km 320-a nain a tleh a, chenna in tam tak a len­chhiat bakah thingkung pawh a chhem tlu nasa hle a, thingkung tlute hian kawngpuite an hnawhpin avangin chhanchhuah hna thawhna kawngah pawh harsatna a siam phah a ni. Thlipui tleh hian an ram khawpui, Port Vila-a chenna in 90% zet a ti­chhia nia sawi a ni.

Vanuatu President Baldwin Lonsdale chuan an ramin chhiatna a tawh­ah ramdangte chu ṭanpui turin a ngen a, an ram sorkar leh Vanuatu mipui­te aiawhin chhiatna tawk­te chhawm­dawlna leh ṭanpuina kawng­a pui turin a sawm.

Thlipui tleh avang hian Inrinni zan aṭang khan mi tam tak chu chenna tur nei loin an awm a ni. An ram khaw­pui, Port Vila-a sorkar­in awm lailawkna tur a siamah mi 2,000 an awm mek niin World Vision chuan a sawi.

Vanuatu khawpui, Port Vila airport chu thlipui tleh vang hian Inrinni khan khar a ni a, nimin khan hawn theih beisei a ni. Airport hi hawn a nih hunah NGO-te chuan thlipui tuarte ṭanpuina turin ei tur, puan in leh damdawi-te an thawnluh theih an beisei.

Australia chuan Vanuatu chu puih tum thu a sawi tawh a, medical leh rescue staff-te pawh a ṭul huna tirh tura buatsaih an ni. UK, France, UN leh EU pawhin ṭanpui an tiam tawh bawk.

Thlipui tuarte ṭanpuina tura sum thawh chu dollar maktaduai 2.9 a tling tawh a, sum thawhtu zingah hian Britain, New Zealand leh European Union pawh an tel.

Vanuatu hi thliarkar tesep 65 awmkhawm niin, Australia leh Hawaii inkara awm a ni a, mi 267,000 an cheng a ni.