Covid-19 kai hmuh chhuah mtd 40 an chuang tawh

Khawvel ram hrang hranga Covid-19 kai hmuh chhuah chu nimin thleng khan mi maktaduai  40 chuang an tling tawh. 

Northern hemisphere-ah thlasik a inṭan chhoh avangin hri kai hi an pung zual nia hriat a ni. Hetih lai hian mithiamte chuan hri kai leh hri vanga thi zat hi report tarlan ai hian a la tam zawk an ring. 

Hri leng hian hun eng emaw chen ziaawm lam a pan hnuah ram tam takah hri kai an pung  thar leh nasa hle. Hri kai hmuh chhuah zat hi ni 32 chhung lekin mi maktaduai 30 aṭanga maktaduai 40-ah an kai chho hman a ni. Wuhan, China-a hri kai hmuh chhuah a nih aṭanga ram hrang hranga a darh hnuah thla thum chuang hnuah hri kai zat hi maktaduai 10 an tling chho a, ni 44 chhungin mtd 10 aṭanga mtd 20-ah tling chho lehin, a hnu ni 38-ah mtd 20 aṭangin mtd 30-ah an kai chho leh a ni. 

Kar liam ta chhung khan hri kai thar hi ni khatah mi  3,47,000 zel awm anga chhut a ni a, October thla chawlhkar hmasa berah kha chuan ni khatah hri kai thar hmuh chhuah hi mi 2,92,000 zel anga chhut a ni thung. 

US, India leh Brazil-te chu hri leng tuar nasa ram an la ni chhunzawm zel. Hetih laih hian khawvel puma hri kai hmuh tawh zinga 47.27% chu North, Central leh South America rama mite an ni. 

US-ah chuan mi 10,000-ah mi 247 zelin  hri an kai ang chhut niin, India-ah mi 10,000-ah 55 leh Brazil-ah 248 anga chhut a ni bawk. 

Europe ram hrang hrang - Italy, Netherlands, Germany, Austria, Poland, Ukraine, Cyprus, leh Czech Republic-ahte hri kai an pung thar leh nasa hle. Eupore ramah hian ni khat hri kai hmuh thar hi 1,50,000 chuangte a ni chho leh tawh a ni. Khawvela hri kai zinga 17% leh hri vanga thi zinga 22% chu Europe rama mi an ni.