Vanuatu chhawmdawlna tur thawn luh ṭan a ni

Thlipui na tak, Cyclone Pam-in a nuai avanga chhiatna nasa tak thlenna, Vanuatu ram chhawmdawlna tur chu thawnluh ṭan a ni.

Thlipui tleh hian inkalpawhna leh in­biakpawhna lam thlengin harsatna a siam a, hei vang hian thi leh hliam zat pawh hriatchian theih a la ni lo.

Vanuatu President Baldwin Lonsdale chuan an rama chhiatna thlen chungchangah ram dang­te ṭanpuina a lo dil tawh a, an ramin hun rei tak chhung hmasawnna hna an lo kalpui tawh chu thlipui chuan nasa taka tichhiain, bul an ṭan ṭhat leh a ngai dawn tih a sawi.

Cyclone Pam hian an ram khawpui, Port Vila-a chenna in 90% zet a tichhia a, mi tam tak chenna neiloin an awm mek a ni. A ram mipui zahve, mi 130,000 vel chuan thlipui tleh vang hian harsatna an tawk a ni.

Thlipui tleh vang Port Vila airport khar chu Pathianni khan hawn leh niin, ram dang aṭanga thlipui tuarte chhawmdawlna pek pawh thawn luh ṭan a ni. New Zealand chuan a sipai thlawhtheihna, Hercules hmangin thlipui tuarte mamawh tur chu Pathianni khan a thawn lut nghal a, Australia pawhin sipai thlawhtheihna pa­hnih tirin, chhan­chhuah hna thawktu tur leh medical expert te bakah, emergency supply pawh a thawn lut tawh bawk. UN team pawh an luh thuai beisei a ni.

Australia chuan Vanuatu ram ṭanpuina turin dollar maktaduai 5 pek a tiam a, Britain pawhin dollar mtd 2.95 pek a tiam bawk.