Belarus president ban phutin kawng zawh leh

Belarus khawpui, Minsk-ah Pathianni khan President Alexander Lukashenko bang tura phutin eptuten kawng an zawh leh.

Lukashenko hi kumin August 9 khan an ram president tur atana thlan nawn leh a ni a, Central Election Commission-in inthlan result a tihchhuahah, Lukashenko hian vote tla aṭangin 80.1% a hmu pha a ni. Thlan nawn leh a nih aṭang khan Belarus mipui tam tak hian bang turin Lukashenko hi an la phut reng a ni. August 9-a inthlana Lukashenko chak dan chu eptuten na takin an sawisel a, vote tihchingpen a nih avangin Lukashenko hi bang tur leh, inthlan ṭhat an phut thu an sawi. 

Pathiannia pungkhawmte hi mi 30,000 chuang an ni a, heng zinga mi 50 chu police-in an man a ni. Khawpui hmun ṭhenkhata mobile broadband signal chu a chhe nual a, grenade puak rite pawh hriat tur a awm nia tarlan a ni. 

Mipui pungkhawmte hnawhdarh nan hian security force-te chuan tui phuhna an hman bakah, barbed wire leh heavy machinery hmangin kawngte  an dang bawk. Heng bakah hian mipui hnawh darh nan hian silaite pawh an hmang nia sawi a ni. Tualchhung media-te chuan security force-ten rubber bullet an hmang niin an sawi a, hetihlai hian pungkhawmte hian lungin security force-te hi an lo tawng let ve bawk niin media-te chuan an tarlang. 

August thlaa inthlan result puan hnuah Lukashenko bang tura phutin ṭum eng emaw zat nawrh huaihawt a ni tawh a, security force-ten nawrh huaihawt an man tawh hi mi 13,000 chuang an ni tawh a ni. An mi mante hi an hrenna hmunah pawh sawisak zui niin, an zingah thi pawh an awm nual tawh niin report ṭhenkhat chuan an tarlang a ni.