Israel Parliament inthlanpui neih a ni

Israel Parliament in­thlanpui chu nimin khan neih a ni a, zing dar 7 aṭanga vote thlak ṭanin, zan dar 10 thleng vote thlak hun hawn a ni.

Central Election Committee chuan vote nei mi maktaduai 5.8 an awm tih a sawi a, one-chamber parliament, Knesset-a member 120 tur an thlang dawn a ni.

Inthlanah hian party 24 in an chuh a, inthlan hmaa mipui ngaihdan lakah heng party zinga party 11-te hian Knesset-ah member an nei thei dawn nia sawi a ni. Vote thlaktute hian mimal ni loin, party angin an thlang ṭhin.

Mipui ngaihdan lak hnuhnung berah eptu pawl, center-left Zionist Unoin chu party mala seat la hnem ber tura ngaih a ni a, seat 25 lain, Prime Minister Benjamin Netanyahu-a party Likud Party chu seat 21 la tura rin a ni.

Israel ram inthlanpui neih tawhah hian party mala sorkarna siam thei an la awm ngai lo a, tun ṭum inthlanah pawh hian ṭangrual sorkar a din leh ngei rin a ni bawk.

Tun ṭum inthlanpui hi Prime Minister Benjamin Netanyahu fiahna anga ngaih a ni bawk a, tun hnaiah Netanyahu hi an ram mipuite laka a dinhmun a tlahniam hle.

Inthlan hma, Thawhṭanni zana thu a sawiah Netanyahu chuan PM atana thlan nawn leh a nih chuan Palestinian state din a remti dawn lo tih a sawi a, East Jerusalem-ah Juda-te chenna tur in sak chhunzawm zel a tiam bawk. Thawhṭanni khan dan loa Israel-in a luahsak nia sawi, West Bank-a Har Homa a tlawh bawk a, Jerusalem chu englai maha ṭhendarh a ni dawn lo tih a sawi. Netanyahu-a party hi thlan tlin a nih a, Prime Minister hna a chelh nawn leh theih chuan Israel rama Prime Minister dinhmun chelh rei thei ber a ni ang.