Myanmar minister-in ramria bomb puak chhui chian a tiam

Malaysia rama cham mek, Myanmar Defence Minister Wai Lwin chuan kar kaltaa Myanmar-China ramria bomb puak chu chhui chian a nih tur thu a tiam. He bomb puakah hian China mi panga an thi a, midang pariatin hliam an tuar.

Wai Lwin hi Langkawi, Malaysia-a ni thum awh Asean Defence Ministers' Meeting hmang turin a zin a ni.

Kuala Lumpur-a press conference a neih­ah, minister chuan bomb puak vanga thi chhung­te leh hliam tuarte chu an tuarpui thu a sawi a, bomb tihpuah a nih chhan dik tak chu chhui a ni dawn tih a sawi.

Minister Lwin chuan, "Myanmar leh China hi hun rei tak aṭang ṭhenawm inngeih leh inṭhianṭha tak a ni a, hei vang hian kan inkar boruak ṭha tak hi chawi nun zel kan duh a, inbiakna hmangin ramria harsatna awm hi chinfel theih ngei kan beisei," a ti.

March 13 khan Myanmar thlawhtheihnain China chhimthlang lam, Yunna province-a Lincang khuaa fu chinna hmunah bomb thlak a ni. China Central Military Commission vice chairman Fan Changlong chuan hetiang thil hi a thleng nawn tawh tur a ni lo tiin, a thleng leh a nih chuan China sipaite chu an mite venghim turin na takin an che nghal tawh dawn tih a sawi. Changlong chuan Myanmar sorkar hnenah pawikhwihtute chu hrem a, thupha chawi tur leh bomb thlak vang thi chhungte chu zangna­dawmna pe turin a phut.