IS-in medical worker 20 ru bo Biak-inah flag an zar

Islamic State (IS) firfiakte chuan Libya ram, Sirte khuaa Ibn Sina Hospital-a thawk lai mi 20 chu Thawhṭanni khan an ru bo.

Firfiakte pawl member 30 vel chuan hospital hi beiin, hnathawktute hi bus-a Libya khawpui Tripoli panpui an nih laiin an ru bo ta a ni. An rukbote hi Libya ram mi an ni lo a, a tam zawk hi Philippines aṭang kal an ni. Ukraine, India leh Serbia mi pawh an tel tih hospital official chuan an sawi.

Official-te chuan IS-te hian an mi leh sa hliam tuarte enkawl an ngaih ṭhin avangin medical worker-te'n Sirte khua an chhuahsan tur hi an duh lo nia an ngaih thu an sawi bawk. Medical worker-te hian firfiakte hlauh vangin Sirte khua hi chhuahsan an tum a ni.

Sirte khua hi Tripoli leh Benghazi inkara awm a ni a, Libya civil war laia an ram hruaitu hlui, Muammar Gaddafi thlawptute chakna bial a ni. Gaddafi pawh he khuaah hian kahhlum a ni. Nikum kum tawp lam khan firfiak pawl hian Sirte khua hi an la a ni.

IS firfiakte hian Iraq-a an ram lak chhunga Kristiante biak-in leh hmun pawimawhte an tihchhiat­sak bakah, biak-inahte IS flag an tar. February thla khan IS hian Egyptian Coptic Christian 21 chu Libya tuipui kamah an lu an lo tansak tawh bawk.

Iraq rama Kristian sang tel chu IS-te vang hian himna zawngin hmun dangah an tlanchhe tawh a, Vatican top diplomat Archbishop Silvano Tomasi chuan firfiak pawl hian mi tam tak an suat tawh avangin, Kristian te bakah hnam leh sakhaw tlem zawkte an bei zel tur danna atan sipai chakna hmanga beih leh mai a ngai dawn tih a sawi.