Ni 11 hnuah mipui hmuhah Putin a inlan

Russia President Vla­dimir Putin chu March 5 hnua a ṭum khatna atan Thawhṭanni khan mipui hmuhah a inlan. Hun rei tak mipui hmuha a inlan loh avang hian sawizui pawh a hlawh hle.

Kum 62 mi, Putin hi Thawhṭanni khan St Peters­burg bula Constantine Palace-ah Kyrgyz President Almazbek Atambayev nen an inkawm a ni.

Kremlin chuan President Putin hian March 5 aṭang khan official meeting a neihte pawh a ṭhulh rih tih sawiin, national television-ah a thlalak leh video-te an tichhuak a, mahse hengte hi media lam chuan a hma daiha a lak tawh niin an sawi. Kar hmasa khan Kazakhtan a zin tur pawh a ṭhulh a ni.

Mipui hmaa hun eng emaw chen a inlan loh avang hian ti ti hrang hrang pawh a tam phah hle a, report ṭhenkhat chuan security agency-te'n a thuneihna aṭangin an paihthla niin an sawi a, Swiss newspaper chuan a bialnu-in naute a neih avangin Switzerland-ah a kal niin an tarlang bawk. Ṭhenkhat chuan a hriselna dinhmun a ṭhat loh vang niin an sawi thung.