Pakistan-ah mi 12 khaihlum an ni

Pakistan sorkar chuan nimin khan thiam loh chang mipa 12 a khaihlum, hei hi nikum December thlaa capital punishment khapna hlih a nih hnua ni khat thilthua mi an khaihlum tam ber ṭum a ni.

Kum 2014 December 17 khan Prime Minister Nawaz Sharif chuan capital punishment khap lailawkna chu a hlip a, heihi Pakistan Taliban-te'n sipai school bei a, zirlai 132 leh zirtirtu pakua an kaphlum tuk kha a ni. He pawikhawihna rapthlak tak hian Pakistan sorkar chu na zawka Islam firfiakte bei let turin a nawr a ni.

Capital punishment khapna hlih a nih aṭang hian mi 27 khaihlum an ni tawh a, an zinga a tam zawk hi firfiak an ni.

Nimina mi 12 khai­hlumte hi firfiak an ni vek lo tih Home Ministry thupuangtu chuan a sawi a, "An zinga ṭhen­khat chu tualthattu an ni a, ṭhenkhat chu pawikhawihna dang rapthlak tak thlentu an ni bawk," a ti. Mi 12-te hi jail hrang hrangah kaihlum an ni tih a sawi bawk.

Pakistan ramah hian thi tura an chungthu relsak mi 8,000 chuang an awm mek a ni. Hetihlai hian human rights group-te chuan an zinga tam tak hi thiam loh chantir an nih dan a fel tawk lo niin an sawi.