Israel Defence Minister-in darkar 48 chhung emergency a puang

Israel defence minister Yoav Gallant chuan Lebanon-in beih an tumna an chet khalh theih nan leh an ram him zawkna atan nimin khan rampumah darkar 48 chhung emergency a puang.

Emergency hi Pathianni, August 25 zing dar 6 aṭanga hman ṭan tur a ni tih a sawi bawk.

Israel Defence Force (IDF) in an ram mipuite himna atan hma an lak theih nan, pungkhawm an tam loh nan leh beih an tawh theihna hmunhma khar a nih theih nan emergency hi puan a ni tih Gallant chuan a sawi.

Israel hian Lebanon helpawl, Hezbollah chu chet khalhin an bei tih an tarlan hnuah Hezbollah hian Israel sipai hmunte bei turin drone leh rocket eng emaw zat Israel lamah an kap chhuak tih an tarlang ve bawk.

Israel sipai hmunte beih nan Katyusha rockets 320 chuang an kap chhuak tawh tih Hezbollah chuan an tarlang a ni. Katyusha hmang hian Israel base leh barrack 11 lai an kap tih an sawi a, heng zingah hian Golan Heights a sipai hmunhmate pawh a tel a ni, an ti.

Hezbollah hian Hamas hotupa Ismail Haniyeh leh an commander Faud Shukr thah an nih vanga Israel an chhan letna a nih thu sawiin a thawh khatna chu an hlawhtling thawkhat hle niin an sawi. Civil mite chunga tuarna a thlen chuan na takin an chhanglet zel dawn tih an sawi bawk. Israel sipaite chuan beih an ni tih hi an la sawichiang lo thung.

Israel sipai chuan Pathianni vek khan thuchhuah siamin, Lebanon chhim lama Hezbollah rocket launcher tam tak zing lamah an kap chhia tih an sawi. "Israel Air Force fighter jet 100 chuang chuan Hezbollah rocket launcher-te hi an kap chhia a ni" an ti. Israel prime minister Benjamin Netanyahu chuan Israel hmar lam himna a ngai pawimawh tih sawiin a him nan eng pawh tih an huam a ni, a ti.

Israel leh Hezbollah inkara nimin lama inkahna chhuak avang hian Middle East-ah indona lian zawk a chhuah mai hlauhthawnna a lian leh tawh hle. United Nation leh Lebanon prime minister te chuan inkap tawh lo tura ngenin boruak ṭha lo zawk thleng thei chu pumpelh an duh tih an tarlang.

Israel-Hamas indona, nikum October, 7-a a chhuah hnu khan Iran thlawp helpawl, Hezbollah hian Hamas lam an ṭang tih lantir nan Israel hi Lebanon aṭangin an kap ṭhin a, Israel pawhin rocket leh drone hmangin a chhanglet ve bawk. Ramri pel loin indona kum khat dawn an kalpui hnuah Lebanon-ah mi 600 chuang an thi tawh tih tarlan niin an zinga 131 chu civil mi an ni. Israel lamah sipai 23 leh civil mi 26-in nunna an chan tawh nia tarlan a ni bawk.