France Police-in Synagogue beitu man

France rama chhim lam, La Grande-Motte khuaa Beth Yaacov synagogue chu Inrinni khan an ram huna zing lam dar 8:00 - 8:30 vel khan misualin hal tumin an bei a, police-te chuan he thil thlenga inhnamhnawih mi pakhat an man nghal.

Pawikhawihtu hian Inrinni zing khan synagogue pawn lama car park pahnih chu halin an puak zui a ni.

Interior minister Gerald Darmanin chuan he pawikhawihna tenawm tak thlentu hi Inrinni vek hian man a nih thu leh, police-te chuan an hna ṭha taka an hlen thei chu fakawm a tih thu a sawi. French media chuan pawikhawihtu hian Nimes khuaa amah man tuma kal police-te chu silaia lo beiin, police-te hian kap let ve nghalin an kap hliam niin an tarlang.

Synagogue pawn lama thil puak vang hian police duty zingah hliam na vak lo tuar an awm. Pawikhawihna thlen lai hian Synagogue chhungah hian mi panga leh rabbi pakhat an awm bawk a, pawikhawihtu hian Palestinian flag a keng nia sawi a ni.

Jewish Community leader Yonathan Arfi chuan he thil thleng hi Juda mite thah tumna a ni tiin, "Inrinni zinga Pathian fakna hun hman tumte chu an bitum a ni," a ti. France president Emmanuel Macron pawhin "Helpawl thiltih" a nih ngei a rin thu sawi bawk. Prime Minister Gabriel Attal chuan pawikhawihna thlenna hmun hi Inrinni chawhnu khan a tlawh nghal a, he thil thleng hi Jewish mi te duhlo leh dodaltu thil tih niin a chhal ve bawk a ni.