Israel inthlanpuiah PM Netanyahu-a party a chak

Israel Parliament inthlanpui, Thawhlehnia neihah Prime Minister Benjamin Netanyahu-a party, ring-wing Likud Party chu party mala seat la hnem ber a ni.

Inthlan hmaa mipui ngaihdan lakah Likud Party ai hian centre-left Zionist Union chu seat la hnem zawk tura ngaih a ni a, PM Netanyahu dinhmun pawh a tla­hniam viau hman a, mahse nimin­a vote chhiarah rin loh zawk Likud Party hi a sang ta zawk a ni.

Parliament, the Knesset-a seat 120 awmah Likud hian seat 30 lain, Zionist Unon hian seat 24 a la a, Prime Minister Benjamin Netanyahu-a kaihhruai ṭangrual sorkar a ding leh thei dawn a ni. Ṭangrual sorkar a siam leh thei a nih chuan Netanyahu hi Israel Prime Minister ni rei thei ber a ni ang.

Zionist Union hruaitu Yitzhak Herzog chuan Netanyahu chu phone-a biain lawmpuina a hlan a, an chak loh an pawm thu a sawi bawk.

Netanyahu chuan an party tan hnehna ropui tak a ni tiin, dinhmun harsa leh khirh tak hnuai­ah hnehna an chang thei a ni, a ti. Nimin khan Likud Party chuan an chak lawmin kawtthlerahte an pungkhawm a ni.

Israel ramah hian party mala sorkar siam thei an la awm ngai lo a, tun ṭumah pawh seat ngah ber, Likud Party hian a mala sorkar a siam theih dawn loh avangin thawhpui tur a zawn a ngai dawn a ni.

Inthlan hmaa thu a sawiah, Netanyahu chuan Prime Minister atana thlan nawn leh a nih chuan Palestinian state chu a din a remti dawn lo a, Palestinian-te'n khawpui atan East Jerusalem siam an tum pawh duhloin, Jerusalem chu ṭhendarh a phal ngai dawn lo tih a lo sawi.

Netanyahu chuan ṭangrual sorkar siam turin Zionist Union chu thawhpui a tum loh thu a sawi tawh a, seat 13 latu Israeli Arab party, Joint Arab List chuan ṭangrual sorkarah tel a tum lo tih a sawi bawk. Hei vang hian Netanyahu hian party tenau zawkte thawhpui tura a sawm a ngai dawn a ni.

Inthlan result hi hriat ni tawh mah se, official chuan kar lehah tih­chhuah a ni chauh ang. Official-a tihchhuah a nih hunah President Reuven Rivlin chuan party mala seat ngah ber chu ṭang­rual sorkar siam turin a sawm ang. Sorkar thar din tur hian hun a duh rei deuh rin a ni.