SKorea sumdawngte'n North factory an tlawh

South Korea factory neitu, North Korea-a industrial complex-a inbunte chuan nimin khan North Korea an tlawh. Factory neitute hi NKorea-in a ram mi hnathawkte hlawh tisang tura a phut chungchangah an lungawi lo a ni.

Korea ram pahnihte an enkawl dun, Kaesong industrial zone hi ramri bul, North ram chinah a awm a ni. Kum 2013 khan North chuan ram pahnihte inkar boruak ṭha lo avang­in he complex hi thla nga chhung a lo khar tawh a ni.

Kaesong industrial zone-ah hian South Korea hian company 125 a nei a, a tam zawk chu firm tenaute an ni. Heng hmunah hian NKorea mi 53,000 chu hnathawka chhawr an ni bawk.

Complex hi kum sawm chhung chu kalpui a ni tawh. Nikum September thla khan North Korea chuan dan thar siamin, company-te chuan an contract siam angte an zawm loh chuan South lam aṭanga hnathawka awmte chu hren beh theih an ni ang, a ti. Hei hi South lama sumdawngte chuan sawisel­in, investment thlengin a tichhe thei dawn a ni, an ti.

NKorea agency chuan complex-a North lam mi hnathawkte hlawh, minimum wage thla khata dollar 70.35 chu dollar 74-a tisang turin a phut. SKorea lam chuan hei hi a pawm lo a, hlawh tihsan phutna chu a sang lutuk a, hei hi inremna an lo siam tawh palzutna a ni, a ti thung. Hetihlai hian North lam chuan Kaesong-a hnathawkte hlawh tihsan sak tur hian dikna a nei tih a sawi.