Indonesia-in AirAsia tla zawn hna a titawp
Indonesia chuan nikuma AirAsia thlawhtheihna tlaa chuangte ruang zawn hna a thawh chu nimin khan a titawp a, thlawhtheihnaa chuang zinga mi 56-te ruang chu hmuh lohin an la awm.
AirAsia hotu chuan thlawhtheihna tla zawn hna an thawh chu hlawhtling taka kalpui ni mah se, tiamchin awm loa zawn chhunzawm zel chu an thei rih lo tih a sawi.
Nimin zing khan thlawhtheihna tla zawng tura tirh lawng lian pali-te chu Jakarta lam panin an kir a ni.
Thawhtheihna chesuala chuang mi 106 te ruang chu hmuh an ni tawh a, kar kalta Inrinni khan ruang pathum chu thlawhtheihna chhe karah an hmuhbelh leh a ni.
Kum 2014 December 28 khan mi 162 chuanna, AirAsia thlawhtheihna Flight QZ8501 chu Surabaya, Indonesia aṭanga Singapore pana thlawk chu khaw chhia leh thli tleh vangin a chesual a, Java
Sea-ah a tla a ni. Thlawhtheihna tla leh a chuangte zawn hna thawhnaah ram hrang hrangte'n Indonesia hi an pui a ni. Indonesia chuan he thlawhtheihna chetsual dan a chhuina report chu August thla hian a tlangzarh ang.