Israel-Hamas indona : Egypt-a inbiakna a hlawhtling lo

Israel leh Hamas indona a tawp theih nana palai hna thawktu ramten inkahhai thuthlung leh mi tang inthleng tura ruahmanna an siamte sawi hona hun, Egypt khawpui Cairo-ah Pathianni, August 25 thlenga neih chu zawh niin inremna an nei thei ta lo.

US official chuan inbiakna chu hlawhtling hrih lo mah se an inrem lohnate sawi ho turin inbiakna kalpui reng a ni dawn tih a sawi. Cairo-ah hian inkahhai buaipuitu- 'working team' chu US, Qatar leh Egypt palaite nen inbiakna neih chhunzawm turin an la cham dawn a ni.

Egypt-a inbiaknaah hian CIA director William Burns leh Mossad hotu David Barnea te an tel a, Hamas hian palai tir lo mah se Egypt leh Qatar palai kaltlangin an inbepawp reng thung. Remna palaite hian Israel leh Hamas in inremna an neih theih ngei an la rin thu sawiin, a taka hman theih tur inremna an neih theih ngei an beisei tih an tarlang.

Israel hian Gaza Strip-a indona bakah an ram hmar lamah Lebanon-a inkhuar, Hezbollah nen rocket leh drone hmangin an inkap reng bawk. Pathianni khan thla tam tak chhunga an inkah nasat ber ṭum tawngin Hezbollah hian Katyusha rocket 320 hmangin Israel an kap niin an chhal a, Israel sipaite chuan jet fighter 100 chuang hmangin Hezbollah rocket launcher an tichhia tih an sawi ve bawk.

Israel prime minister Benjamin Netanyahu chuan an ram hmar lam a him theih nan leh mipuite him taka an hruai haw theih nan Hezbollah chu an kap tih a sawi a, Pathiannia an inbeihna hi a tawpna a ni dawn lo tiin Hezbollah chu a vau bawk.