NKorea-in 'suicide drones' an tlangzarh

North Korea state media chuan Thawhṭanni khan an ram hruaitu Kim Jong Un chuan 'suicide drones' a tlangzarh tih an tarlang. Kim hian drone-te hi a hmunah a enchhin nghal bawk a ni.

Suicide drones hi puakthei thil pai, an hmelmate ṭan hmun beih nana duan niin guided missiles angin kaihhruai theih an ni a, hetiang ralthuam neih leh tam zawka siam chhuah an mamawh tih Kim Jong Un chuan a sawi.

NKorea sorkar thu hnuaia awm, Korean Central News Agency (KCNA) chuan an drone neihte chu lei lam leh tuipuia an hmelmate beih nan hman theih an ni tih sawiin, an beih theih chin pawh a inang lo niin an tarlang.

KCNA hian kar liam ta Inrinni, August 24-a drone an enchhinte chuan beih tura an bituk chu ṭha taka an beih thu sawiin an hlawhtling hle a ni, an ti. Kim Jong Un chuan an drone neihte tihchangtlun nan artificial intelligence hman ṭangkai an tum tih a sawi bawk.