Pakistan : Helpawlin mi 39 an kap hlum

Pakistan chhim thlang lama inlakhran duhtu helpawl chuan police station, rel kawng leh kawngpuia lirthei tlante chu Pathianni zan khan an bei a, mi 39 an kap hlum. Pawikhawihtu helpawl hi Baloch Liberation Army (BLA) nia tarlan a ni.

Balochistan province sorkar thupuangtu Shahid Rind chuan hriat theih chinah BLA beihna vang hian mi 39 an thi tih a sawi. He province-ah hian Pakistan aṭanga zalenna duhtu helpawl chuan sorkar nawr nan ralthuam an chelek ṭhin a ni.

Baloch Liberation Army hian Musakhail-a lirtheite an beih hma hian security force an beih dawn avangin mipuite chu highway aṭanga inthiarfihlim turin an chah. Hriattirna an tihchhuah hnu hian BLA chuan Musakhail-ah hian bus, truck leh lirthei danga chuangte beiin mi 23 chu an kap hlum a ni. Hemi bakah hian an insaseng hmain lirthei 10 chuang an hal bawk.

Balochistan province, Qalat district-ah ralthuam keng mi pakhat chuan mi pakua a kaphlum bawk. An zinga pali chu police niin midang panga chu civil mi nia tarlan a ni. Hemi bakah hian helpawlte chuan Bolan-ah rail kawng chu puakthei thil hmangin an beih bakah Mastung-a police station leh Gwadar-ah lirthei an hal bawk a, hengte hi Balochistan province chhunga mi vek niin thi erawh an awm lo nia tarlan a ni.