China sipaiten Myanmar ramriah armed patrol nei

China sipai thupuangtu chuan Thawhṭanni, August 26 khan an ram khawmual leh boruak sipaite chu Myanmar nen an inrinaa joint patrol neih tir an ni tih a sawi.

Myanmar-a rorelna chelhtu, sipai sorkar leh sipai dodaltu ṭangrual pawlte inkara inbeihna a sosan zel avangin ramri venhim nan sipaite hi an in ralrin tir niin China chuan a tarlang. He patrol hian Ruili, Zhenkang leh China ramri hnaih lai bik te chu a huam thu an tarlang bawk.

Tualchhung buaina avanga Myanmar ram chhunga inkahna thleng mek hi Northern Kachin leh Shan state-ahte a nasa zual a, an inbeihnaah hian artillery te hman niin hei hian Chinese ram chhung lama mihring te a hliam bakah, bungrua leh infrastructure project te a ngawng theih vangin China lam hi an lo inralring a ni.

Chinese People's Liberation Army-a Southern Theatre chuan ramri depa buaina sosang tur laka invenna leh lo inralrin nan sipaite theihna leh thiamnate chu enchhin a ni tih a sawi. PLA chuan China leh Myanmar inrina ah hian August 27 -29 chhung hian live-fire exercise an nei dawn tih an sawi bawk. He nunchan zirna hi South Ruili huam chhungah leh Zhenkang county huam chung hmun hrang hrang ah te, Gengma Dai leh Yunna province khawthlang lama Va autonomous county-ahte neih a ni ang.

China chuan an ṭhenawm ram tualchhung buaina hian China - Myanmar ramri ah a ṭha lo zawngin nghawng a neih thu a sawi. China foreign minister Wang Yi chuan tunhnai khan Myanmar ram boruak ṭha leh muanawm a awm leh theihna turin China chuan theihtawp a chhuah zel dawn tih a sawi bawk.