Bangladesh : Sheikh Hasina thawn haw turin India an ngen

Bangladesh Nationalist Party (BNP) general secretary, Mirza Fakhrul Islam Alamgir chuan India-a inhumhimna zawnga biru mek, prime minister hlui Sheikh Hasina thawn haw turin a ngen.

Alamgir hian Hasina lakah tualthah thubuai leh a dang tam tak ziah luh a nih tawh avangin an rama thawn haw a nih theih nan kawng an dap dawn tih a sawi. Bangladesh mipui rilruah Hasina chu a tla na tawh lo hle a, India pawhin an ram mipuite rilru puthmang thlira Hasina thawn haw tura thutlukna a siam a beisei a ni.

Sheikh Hasina chuan Bangladesh-a pawi tam tam a khawih tih sawiin, a thil tihsuala mawhphurhna a lak theih nan India pawhin a puih ngei a beisei tih Alamgir chuan a sawi.

Alamgir chuan India nen project hrang hrang an thawh hona chungchang pawh sawilangin an party, BNP chuan energy sector-a an thawh hona chu an ennawn dawn tih a tarlang. "Bangladesh tana ṭangkai project-te chu kan humhim ang, mahse inremna tlem azawng ennawn tur erawh kan nei a, heng zingah hian Adani nen kawlphetha lei tura an inremna chu a tel a ni" a ti.

Sheikh Hasina-in June thlaa India a tlawh ṭuma inkalpawhna ṭha a awm theih nana inremna an lo ziah chu khawi lam tan pawn awmze awm lo thil a ni tih Alamgir chuan a sawi. Hetih rual hian inkalpawhna project Bangladesh-in a hlawkpui tam tak a awm tih a sawilang ve bawk.

Hasina kaihhruai sorkar paihthlak a nih hnuah BNP hian sorkar lailawk piang chu an thlawp a, inthlan hmachhawn turin an inpeih thawkhat tawh hle. Bangladesh sorkar lailawka chief advisor Muhammad Yunus chuan inthlan hi an huaihawt ngei dawn a, mahse politics lama inbiakna neih hmasak a ni dawn a ni, a ti.