Burkina Faso-ah Islam firfiakten mi 100 chuang an that

Burkina Faso rama thingtlang khua, Barsalogho chu al-Qaeda nena inthlunzawm, Islam firfiakte chuan beiin mi 100 chuang an that a ni. Hei hi tun hnaia West Africa inbeihnaa thi an tam ber ṭum nia tarlan a ni.

Barsalogho khaw mite hian kar liam ta Inrinni khan an khaw venhim nan leh security force te tawmhimna tur trench an laih pui a, hetihlai hian al-Qaeda nena inthlunzawm Islam firfiakte chuan helai hmun hi rawn beiin civil mi leh sipai 100 chuang an kap hlum a ni.

Sipai leh firfiak pawl inkahnaa thi zat hi chiang taka tarlan ni lo mah se video darh aṭanga chhutin mi 100 an tling ngei tih hriat a ni. Al-Qaeda chuan pawikhawihna thleng hi an tih a nih thu an puang tawh a, Barsalogho a sipai hmunte chu an thunun tawh tih an sawi bawk.

Burkina Faso security minister Mahamadou Sana chuan firfiak pawlte hi an chhang let tawh tih sawiin, lei lam leh van lam aṭangin beihpui an thlak tih a sawi.