Israel sipaiten Gaza-a Hamas mi hren an chhanchhuak

Israel sipaite chuan Palestinian firfiak pawl, Hamas-ten October 7,2023-a Israel an beih ṭuma an mi man zinga mi, Gaza Strip-a an hren zui tak pakhat chu Thawhlehni, August 27 khan an chhanchhuak tih an sawi.

Thuchhuah an siamah, Israel sipai chuan an mi chhanchhuah hi Israel Bedouin, kum 52 mi Kaid Alkadi a ni tih an tarlang a, sipaiten Gaza Strip chhim lama Hamas ten an hrenna hmuna beihpui an thlak hnuah chhanchhuah a ni, an ti. A hriselna dinhmun pawh a ṭha a, medical check-up nei turin damdawi-inah dah a nih thu an sawi bawk.

Israel defence minister Yoav Gallant chuan Hamas mi hrente chu an vaia chhanchhuah a, an inah ṭheuh hruai haw turin theihtawp an chhuah zel tih a sawi. October 7,2023-a Hamas ten Israel an beih ṭum khan mi 1,200 vel kaphlumin, mi 251 an man bawk. An mi man zinga ṭhenkhat chu chhuah an ni tawh a, mi 34 chu an thi tawh nia sawi a ni bawk a, tunah hian mi 104 vel an la hreng mek nia hriat a ni.

Israel campaign group, Hostages and Missing Families Forum chuan Alkadi chhanchhuah a nih chu thil mak leh lawmawm a nih thu an sawi a, hemi rual hian ni 326 zet tihnawmnah leh hrehawm taka awm mek, Hamas mi hren dangte chhanchhuak tur chuan sipaite beihpui thlakna chauh a tawk lo a, inbiakna hmanga inremna siam a ngai a ni, an ti. Hamas-ten chu an mi hren mekte chhuah vek an nih theihna turin, inremna siam tur rawtna awmte chu pawm tura Hamas-te nawr turin pawl leh ram hrang hrangte an ngen bawk.