Germany-in Africa tan Mpox vaccine dose 100,000 pe dawn

Germany chuan Democratic Republic of Congo (DRC) leh Africa ram dangah MPox hri leng mek darh zel tur venna atan mpox vaccine dose 100,000 a pe dawn tih a puang. Hemi atan hian Germany sipaite hman tur dah hran, vaccine dose 118,000 dawn chu a zo deuh vek dawn a ni.

Germany hian Gavi Vaccine Alliance kaltlangin, sum leh pai hmangin World Health Organization (WHO) leh Africa ramte chu a pui dawn bawk.

Sorkar thupuangtu Steffen Hebestreit chuan, "Berlin hian a tum ber chu khawvel inpumkhatna kaltlanga African khawmualpui aṭanga Mpox darh zel tur lo ven leh, African Union (AU) te chu tualchhung siam chhuah vaccine siamna kawnga lo puih a ni," a ti.

World Health Organization chuan tun thla tir lam khan DRC-a Mpox strain thar hmuh chu rampawnah kai an hmuh chhuah avangin, khawvel huapa vantlang hriselna nghawng thei a ni tiin khawvel pumah public health emergency a lo puang tawh a ni. WHO chuan he nat hri hi tihtawp theih a nih thu sawi mah se, hemi atan hian mitinte ṭanrualna bakah a senso nasa tak a ngai dawn niin a tarlang. Mpox hri darh zel tur venna atan kar hmasa khan France chuan vaccine dose 100,000 an thawh tur thu puangin, US pawhin dose 50,000 an thawh dawn tih an sawi ve bawk.

Mpox hi monkeypox tia hriat lar ṭhin niin natna tharlam ni loin kum 10 liamta pawh khan he natna hi a lo awm tawh a,tun hnaia lo darh ta pawh hi a natna awmsa aṭanga insiam danglam a nih rin a ni. He natna hi thihpui theih leh inkaichhawn theih a ni a, tuna a hrik thar an hmuhchhuah Clade 1b hi kuminah mi 570 in an thihpui tawh a ni. He hri hi DRC, Burundi, Kenya, Rwanda leh Uganda-ahte a darh nasa zual a, Europe ram zingah Sweden-ah Mpox thihpui hi an awm tawh bawk.

Mpox natna hrik hi ran aṭangin mihringah a kai theih a, mihring leh mihringah pawh taksa insik tawnna aṭangin kai theih a ni a, infawh leh mipat hmeichhiatna hman aṭangin inkai a awlsam zual a ni.