Trump-a'n Harris nena debate neih a remti

US President thlanna neih tura Republican presidential nominee Donald Trump chuan a khingpui tur, Democratic presidential candidate Kamala Harris nen September 10-a debate neih a remtih thu a sawi. He debate-ah hian June thlaa CNN debate buatsaiha rules kha hman a ni leh ang, a ti.

Trump chuan a social media platform, Truth-ah hemi chungchang hi rawn post in, September 10-ah Philadephia, Pennsylvania-ah debate hi neih a ni dawn tih a sawi.

Debate rules chungchangah inhnialna a awm avangin Trump leh Harris te debate neih tur hi ṭhulh a ni maithei nia sawi a lo ni tawh a ni. Mahse June 27-a Trump leh US president Joe Biden-ten debate an neih ṭum rules an hman ang kha hman leh an remti thei a ni. He rules hnuaiah live audience an awm lo ang a, candidate thusawi lo zawk microphone chu off sak a ni ṭhin bawk ang. He debate hi ABC ah pek chhuah a ni dawn a ni.

June thlaa Trump leh Biden-te debate neihah khan Biden a chet ṭhat loh em avangin an party, Democrats party mi leh sate chuan president candidate a nihna aṭang inhnukdawk turin an ngen a, an nawrna avangin Biden hi inhnukdawkin, a vice president Kamala Harris chu party presidential nominee a ni zui ta zawk a ni.

Trump chuan September 4-a Fox News debate neih tura tih chu Harris hian a duh lo tih a sawi a,mahse a rilru a thlak a nih chuan debate nei tur hian a la inhawng reng tih a sawi zui bawk.