Saudi Arabia-a mosque-ah bomb tipuak

Saudi Arabia rama Medina khawpuia Prophet Mosque-ah Thawhṭanni khan thihchilh bomb a puak a, bomb tipuaktu bakah mosque vengtu pali an thi a, mi dang panga-in hliam an tuar. Hemi ni vek hian Jeddah leh Qatif khuaah bomb tihpuah a ni bawk.

Medina-a Prophet Mosque hi Prophet Muhammad phumna hmun a ni a, Islam hmun thianghlim leh pawimawh ber zinga mi a ni. He mosque hi Al-Masjid an-Nabawi tia sawi a ni bawk. Medina khua hi Mecca dawta khaw thianghlima an ngaih a ni bawk. Thawhṭanni ni tlak hnua ṭawngṭai tura mi an kal laiin thihchilh bomb hi tihpuah a ni.

Saudi Arabia Interior ministry chuan bomb paitu hian mosque chhunga luh a tum chu security guard-te hian an lo dang a, hei vang hian mosque pawnah a bomb pai hi a tipuak ta niin a sawi. Bomb puah lai hian mosque chhungah ṭawngṭaia hun hmang mi sang tel an awm a ni.

Medina khua beih a nih hnu hian khawvel hmun hrang hrangah Muslim-te chuan an thinrim thu an sawichhuak a, Iran Foreign Minister Javed Zarif chuan a Twitter-ah firfiakte chuan engmah serh pawh an nei lo a, hei vang hian Sunni leh Shia muslim-te chu lungrual taka an awm loh chuan an tuar belh zel a hlauhawm thu a sawi. Abu Dhabi Crown Prince, Mohammed bin Zaued al-Nahyan pawhin firfiakte lak aṭanga Muslim sakhua humhim tura theihtawp an chhuah an ngaih thu a sawi.

Medina khuaa bomb tihpuah a nih hun lai vek hian an ram khawchhak lam, Qatif-a mosque bulah ṭum hnih bomb tihpuah a ni bawk. Bomb tipuaktu hian a bomb pai hi Shia moque bulah a tipuak a, mahse midang thi leh hliam erawh an awm hriat a ni lo.

Thawhṭanni zing khan Jeddah khuaa US consulate bulah thihchilh bomb tihpuah a ni bawk a, security officer pahnihin hliam an tuar. Security officer-te hian Dr Suleiman Fateh Hospital car park-na bula mi pakhat awm chu ringhlein, thu zawhchian tumin an pan a, mahse ani hian parking chhungah a bomb pai hi a lo tipuak ta niin interior ministry chuan a tarlang.

Saudi khawpui hrang hranga bomb puak hi eng pawl mahin an tih niin an la chhal lo a, mahse Islamic State (IS) firfiakte an inrawlh erawh rin a ni thung. IS ho hian kum hnih kalta chhung khan Saudia ramah hian pawikhawihna an thlen fo a ni. Interior ministry chuan kum hnih chhung hian an ram chhung hmun hrang hrangah firfiakte pawikhawihna ṭum 26 a thleng niin a sawi.

Nikum October thla khan IS firfiakte hian Najran-a Shia mosque-ah bomb an lo tipuak tawh a, hei bakah hian August thla khan Abha khuaa special forces headquarters-a mosque an lo bei tawh bawk a ni.