Bangladesh aṭangin Japan aid agency inlakchhuah tum

Bangladesh khawpui, Dhaka-a firfiakten cafe an beihnaah Japan mi hnathawka awm pasarih an thih tel avangin Bangladesh rama chhawmdawl hna thawka awm, Japan aid agency chu an inla chhuak maithei.

Japan governmental agency, Japan International Cooperation Agency (JICA) chuan Bangladesh ramah hian project hrang hrang a thawk meka, lei dawh hna te, kawng leh rel kawng siam te, tuikawng siam leh sanitation system lamte a thawk a ni.

Mahse JICA thupuangtu chuan Dhaka-a pawikhawihna thlen hnu hian Bangladesh aṭanga inlakchhuak mai chu an ngaihtuah niin a sawi. Cafe beihnaa Japan mi thi te hi Tokyo-a hmunpui nei, consulting firm Almec Corporation hnuaia thawk pathum, Oriental Consultants Global and Koyo Ogasawara-a thawk pathum leh Katahira and Engineers International-a thawk pakhat an ni.

JICA President Shinichi Kitaoka chuan Bangladesh-a Japan mi la awmte chu fimkhur turin a chah nghalbawk. JICA annual report chuan kum 2014 April - 2015 March thla chhung khan Bangladesh-a chhawmdawl hna thawhna atan hian dollar maktaduai 479 a hmang niin a tarlang.