Philippines-ah mi 40 chuang tihlum tawh

Philippines President thar atana Rodrigo Duterte lakluh a nih aṭanga ni li chhungin ruihhlo tawlhruknaa inhnamhnawiha rinhlelh mi 45 tihhlum an ni tawh nia sawi a ni.

Philippines rama TV channel lian ber, ABS-CBN chuan June 30-a President thar atana Duterte lakluh a nih aṭang khan Bulacan province-ah chuan rukruk leh ruihhlo tawlhnaa inhnamhnawiha rinhlelh mi 29 tihhlum an ni tawh a, Manila khuaah midang pakua kahhlum an ni tawh bawk niin a tarlang. Thuneitute chuan an mi rinhlelhte hian man duh loa police officer-te an lo beih let avangin kahhlum an ni tih an sawi thung.

Kar kalta Ningani-a President thar atana rinawmna thu tiamtira lakluh a nih khan, Duterte chuan an rama ruihhlo-a sumdawngte chu nuaibo vek a duh thu a lo sawi tawh a, amah thlawptute hnenah pawh hetiang mite chu an nu leh pate tan tihhlum chu a har dawn avangin lo thah sak mai turin a ti a ni.

Duterte-a police commander Ronald dela Rosa pawhin police officer zinga ruihhlo-a sumdawnna lama inhnamhnawihna neite chu thi tura an chungthu relsak mai a hreh dawn lo tih a sawi bawk.

Media report chuan May 9-a inthlanpui neiha Duterte a chak hnu khan, ruihhloa sumdawng nia rinhlelh, tualthattu leh rukhmang mi 100 chuang an thi tawh niin an tarlang.

Thawhṭanni khan hmarlama Cagayan province-ah ruihhlo dollar maktaduai 19.23 hu man a ni a, hengte hi China emaw Taiwan emaw ram aṭanga lakluh nia rin a nih thu dela Rosa chuan a sawi.

Communist armed group New People's Army chuan thuchhuah siamin, President Duterte-an ruihhlo laka indo a puang chu an thlawp thu an sawi a, an pawl pawhin a hranin ruihhlo zuarte lakah beihpui an thlak dawn tih an tarlang.