Africa-ah Israel PM a zin

Israel Prime Minister Benjamin Netanyahu chu PM a nih hnua a ṭum khatna atan Africa ram pali tlawh turin a zin. Israel PM zinga Africa ram tlawh hnuhnung ber chu Yitzhak Rabin a ni a, kum 1999 khan Morocco rama tlawh a ni.

Thawhṭannia Africa lam pana a zinchhuah hmaa thuchhuah a siamah, Netanyahu chuan Africa ram a tlawh tur chu an ram tana chhinchhiah tlak, an inlaichinna atana thil pawimawh a nih thu a sawi.

Netanyahu hian ni li chhungin ram pali - Uganda, Kenya, Rwanda leh Ethiopia ramte a tlawh dawn a ni. Uganda ram a tlawh hmasa ber a, Entebbe-ah Africa ram pasarih hruaitute nen meeting an nei nghal bawk. He meeting-ah hian Africa ram pasarih - Kenya, Rwand, South Sudan, Ethiopia, Zambia leh Tanzania ram aiawhte an tel.

Prime Minister Office chuan company 50 chuanga sumdawng aiawh mi 80 velin PM zin hi an zui tih a sawi a, hengte hian Africa ram leh company-te chu sumdawnna lama thawhpui dan tur an zawng nghal dawn a ni. Kenya leh Ethiopia rama economic seminar neihah pawh an tel nghal bawk ang.

Israel hian Africa ram nena an inzawmna nghet zawka siam tumin a bei mek a, an inzawna pawh a ṭha chho hle a ni. Defence Minister Avigdor Lieberman pawhin Africa khawmual hi fangin politician leh sumdawngte a lo kawm tawh bawk. March thla khan Israel Foreign Ministry-a director-general Dore Gold pawhin South Africa rama tlawh a ni.

Africa ram hruaitu zingah Kenya President Uhuru Kenyatta leh Liberia President Ellen Johnson Sirleaf-te pawhin Israel hi an lo tlawh tawh bawk a ni.