Clinton-i email hian US himna a tiderthawng - Donald Trump

US President thlanna neih tura Republican party leh Democratic party candidate tur, Donald Trump leh Hillary Clinton-i te chu ṭawngkamin an inbei na sawt hle.

Donald Trump chuan US Secretary of State a nih laia sorkar thil pawimawha Hillary Clinton-in a private email-a a lo hman avangin ram pum himna a tiderthawng a ni, a ti. FBI-in Clinton-i laka criminal charge a siam lo chuan rorelna fel tawk lohzia a tilang a ni, a ti bawk.

Trump leh Clinton-i te hian party president candidate ni tura delegate mamawh zat nei tling tawh mah se, official-a candidate tura puan an la ni lo a, tun thla tawp lama party convention an neih hunah official nominee atan puan an ni ang.

Clinton-in sorkar email private email anga a hman chungchang hian sawizui leh buaipui a hlawh hle a, FBI Director James Comey chuan Clinton-i hi information pawimawh a buaipui danah a fimkhur tawk lo hle a ni a ti a, mahse hei hi criminal charge siam phahna tur khawp a ni lo niin a sawi.

Mahse Trump chuan North Carolina rally-ah hei hi a pawmpui loh thu sawiin, Clinton-i hum tumna tur system siamah a puh let a ni. Clinton-i rorel dan chu a ṭha lo hle tih sawiin, president ṭha tak a ni dawn lo a ni, a ti.

FBI hian private email hman chungchangah Clinton-i agent-te chu thu an zawtfiah a ni. FBI Director Comey chuan federal investigator-ten an chhui chiannah 52 email chain aṭangin email 110 chu sorkar kaihhnawih thil information pawimawh inpekna a nih thu leh, email pariat thawnchhuah phei chu thuruk pawimawh, top secret a nih thu a sawi. Clinton-i chu sorkar thuruk pawimawh a enkawl danah a fimkhur tawk lo a ni a ti a, mahse hemirual hian Clinton-i leh a thawhpuite chuan dan palzut an tum ngei tih finfiahna erawh a awm lo niin a sawi.

Clinton-i campaign chuan FBI thutlukna siam dan chu lawmawm a tih thu a sawi a, amah ngei pawhin sorkar hna kaihhnawih thila a private email a lo hmang chu a tisual hle tih sawiin, hei hi a thlen nawn tawh lo tur thu a sawi bawk.