Turkey-in Gaza-ah chhawmdawlna a thawn

Turkey chuan Israel nen inremna an siam hnuah Israel kaltlangin Gaza Strip-ah chhawmdawlna a thawn lut ta.

Gaza Strip tana chhawmdawlna thawnluhte hi thawmhnaw, toys, ei tur leh damdawite a ni. Israel leh Turkey hian kum ruk zet buaina an lo neih tawh chu an titawp a ni.

Chhawmdawlna hi lawnglian hmanga phur a ni a, ton 11,000 vela rit a ni. Thawhṭanni khan Turkey lawnglian hian Israel lawngchawlh hmun, Ashdod a thleng a, heta ṭang hian bungruate hi motor-in Gaza lam panpui a ni.

Turkish Red Crescent Society enpuina hnuaiah motor rualte hi Gaza lamah tlantir an ni a, Kerem Shalom crossing kaltlangin Gaza hi an lut a ni.

Kum 2010 khan Israel phalna nei loa Gaza-a chhawmdawlna phurh luh tum, Gaza lawng chu Israel sipaiten dapsakin an inbeihnaah activist 10 an that a, hemi hnu hian Turkey leh Israel inkar boruak hi a chhe chho hle a ni.

Turkey chuan Israel-in Gaza luh leh chhuahna a dan hi hlip turin a nawr reng a, tunhnaiah inremna siamin Ashod kaltlanga Palestinian mite tana chhawmdawlna thawn luh hi an remti a ni.

Israel chuan Gaza kawng dan chu Palestinian helpawl, Gaza-a roreltu Hamas hoin ralthuam an lakluh tur venna atana thil pawimawh tak niin a sawi thung a, UN leh ram dangten kawng a dan hlip turin nawr fo mah se a ngenna hi a pawm duh lo a ni. Turkey ram hi Hamas nen hian inṭhianṭha tak a ni a, Palestinian mite thlavang hauhna a sawichhuak fo ṭhin.