US-in Israel ruahmanna a sawisel

Israel sorkarin Pales-tinian ram a luah, East Jerusalem leh West Bank-a Juda-te chenna bial tur a siamah in tam tham tak sakbelh leh tuma ruahmanna a siam chu US chuan a sawisel.

US State department thupuangtu, John Kirby chuan Israel ruahman-na siam chu ram inchhuh-sakna angah a ngaih thu a sawi.

Israel Prime Minister Benjamin Netanyahu chuan Thawhlehni khan Juda-te in sakna tura ruahmanna siam hi a remtihpui a ni.

In sak thar tura rua-hmanna siam zingah hian Jerusalem khaw pawna Maale Adumin hmunah in thar 560 leh, khawpui chunga in 200 sakna tur a tel a, hei bakah hian East Jerusalem-a in 600 sak tharna tur pawh a tel bawk.

UN hotu Ban Ki-moon pawhin he ruahmanna siam hi na takin a sawisel a, Israel minister ṭhen-khatten West Bank luahsak chhunzawm zel an duh thu an sawi chuan Israel-in hun lo kal zel tura a thil tum chungchangah rinhlelhna a siam thei a ni, a ti.

Palestinian-te chuan kum 1967 indo laia Israel-in an ram a laksak, West Bank, Gaza Strip leh East Jerusalem-ah chuan Palestinian ram hran din an duh a, Israel nena inremna kawng zawnga inbakna an neih chu kum 2014 aṭang khan an chhunzawm thei tawh lo a ni.