Muslim hruaituten Medina-a pawikhawihna thleng an dem

Saudia Arabia-a Medina khuaa Islam hmun thianghlim, Prophet Mohammad-a thlan awmna, Prophet Mosque bula thihchilh bomb puak chu khawvel ram hrang hranga Muslim hruaituten an dem thu an sawi.

Thawhṭanni khan Prophet Mosque bakah hian Jedah leh Qatif khuaahte thihchilh bomb tipuah a ni bawk.

Saudi Arabia interior ministry chuan khawpui pathuma bomb puak chu a dem thu sawiin, he pawikhawihna thlentu mi tenawm takte chuan hmun, hun leh pawisawilote nunna zahna engmah an nei lo a ni, a ti.

Iran foreign minister Javad Zarif chuan Medina beih a ni chu a dem thu sawiin, Muslim-te inpumkhat taka an awm a ṭul thu a sawi.

Indonesia president Joko Widodo chuan firfiakte pawikhawihna chu eng kawng maha ngaihnathiam theih a ni lo a ti a, mipuite chu chiai lo tura a chah rualin fimkhur turin a chah nghal bawk.

Malaysia prime minister Najib Razak pawhin Prophet Muhammad-a phumna mosque bula bomb tihpuah chu a dem thu a sawi a, sakhaw hmun pawimawh zahna nei loa beih a ni chu an dem takzet tih a sawi.

Pakistan foreign ministry pawhin Medina beih a ni chu an dem thu a sawi a, sipai hotu General Raheel chuan Saudi Defence Minister Prince Mihammad bin Salman biain, an tawrhpui thu a hrilh bawk.

Turkey foreign minister Melvut Cavusoglu pawhin Saudia Arabia mipuite a tawrhpui thu a thawn bawk a ni.

Cairo-a hmunpui nei, Sunni Islam thuneitute sang Al-Azhar chuan hmun thianghlim zahna nei loa beih a ni chu an dem thu a sawi a, sakhaw behchhana thisen chhuahna thleng chu an pawm theih loh thu an sawi bawk.

Lebanon-a Shia group, Hezbollah pawhin Muslim zawng zawngten hmun thianghlima an ngaih beih a ni chuan firfiakte nihna dik tak a ti lang a ni, a ti.

Jordan leh Lebanon sorkar pawhin pawikhawihna thleng hi an dem thu an sawi bawk.