US-in NKorea hotu hrekna siam

US chuan North Korea ram hotu lu ber, Kim Jong-un chu mihring dikna chanvo palzutah puhin a vawikhatna atan mimala hrekna a siamsak.

US Treasury chuan thuchhuah siamin, Kim hi an rama mihring dikna chanvo palzutnaah a mawhphurtu berah ngaih a nih thu a sawi a, ani bakah hian North Korean official dang 10 pawh blacklist-ah telh an ni bawk. US thuchhuah siam chungchang hi NKorea chuan a la chhang let lo.

Mimal hrekna siam hnuaiah hian US-a an hminga thil an neihte khawih chet theih loha hrensak an ni ang a, hei bakah hian US mi leh sate nen sumdawnna an tihdun khap a ni bawk.

North Korea hian nuclear program a kalpui avangin hrekna na tak pek ni mah se, a mimalin an ram hruaitu hrekna hi US chuan a la siam lo a ni.

Treasury thuchhuah chuan, "Kim Jong-un hnuaiah North Korea sorkar chu a mite chungah rawng takin a che a, dinhmun hreh≠awm takah a dah a ni. Sorkar policy kalh vanga inthahna te, tihluihna hmanga hnathawka chhawr leh innghaisaknate a thleng fo a ni, a ti.

State Department-in North Korea rama mihring dikna chanvo palzut a nih dan document a tih≠chhuah hnuah Kim Jong-un hrekna tur hi siam a ni. State Department report chuan NKorea prison camp-ah mi 80,000-120,000 vel hren an nih mek thu leh, heng mite hian nghaisak leh mipat hmeichhiat lam hawia khawih an tawh fo bakah, tihhlum an ni fo niin a sawi.

Department thupuangtu, John Kirby chuan Kim hrekna tur hi siam ni mah se, hei hian a thil tum engmah a tihdanglam phah a rin loh thu a sawi. US hian a hmain Syria president Bashar al-Assad leh Libya hruaitu hlui, Muammar Gaddafi hrekna a lo siam tawh bawk a ni.