South China Sea thuah China-in US a vau lawk

Chinese foreign minister chuan US secretary of state John Kerry hnenah South China Sea-ah China ram thuneihna leh himna tiderthawng zawngin hma a la tur a ni lo tih a hrilh.

South China Sea-a ram leh tuipui inchuh chungchangah hian Philippines chuan thubuai a theh≠lut a, hemi thua thutlukna hi The Hague-a arbitration court chuan July 12 hian a tichhuak dawn a, chumi hma chuan inchuh thubuaia US lo inrawlh lo turin China hian US chu a lo vau lawk a ni. Inchuh thuah hian US chuan Philippines a thlawp a ni.

Chinese foreign minister Wang Yi chuan John Kerry hi telephone hmanga biain, South China Sea buainaah hian China himna tiderthawng thei zawnga hma la lo tur leh inrawlh lo turin a hrilh a, "China chuan a thuneihna leh a thunun chhunga tuipui himna turin theihtawp a chhuah dawn a, South China Sea pawh hi a him a, hmun muanawm a nih theih nan a bei ang," a ti.

South China Sea inchuh chung≠changah hian China chuan US chu buaina tipunluntu leh harsatna thlentuah a puh a ni. Hei bakah hian tuipuia ralmuanna tlawh chhanin US chuan heng tuipuite hi a sipaite tana remchangah a hmang tiin a puh bawk. US hian China chu South China Sea huam chhunga China awp thliarkarah China hian sipai leh ralthuam a chhÍk niin a puh thung.