Dallas-a nawrh huaihawtnaah police 4 kaphlum

Dallas, US-ah police-in mi hang pakhat a kahhlum avanga lungawi lohna lantir a, Black Lives Matter rally neihnaah sniper-ten police officer pali an kahhlum bakah, mi dang pasarih an kaphliam bawk.

Dallas Police hotu, David Brown chuan thuchhuah siamin, Ningani-a nawrh huaihawtna hmunah hian sniper-te hian ṭanhmun lo siamin, police duty te chu an lo kap niin a sawi. Brown chuan sniper pakhat zawk hi Dallas khaw chuanhnuai lama garage pakhatah an um lut niin a sawi a, pakhat zawk chanchin erawh hriat a ni lo.

Nilaini tlai khan Minnesota-a St Paul bulah police pakhatin mihang, Philando Castile, kum 32 a kap≠hlum a, a kaphlum lai hi a bialnu chuan internet-ah a tilang a, thlirtu pawh an tam hle. Hemi hma hian mihang vek, Alton Sterling chu Baton Rouge, Louisiana-ah mingo police officer nen an intihbuai hnuin kahhlum a lo ni tawh bawk.

Mihangten police kut an tuar leh ṭhin duh lohna lantir hian khawpui hrang hrangah kawngzawh huaihawt a ni. Chicago-ah chuan nawrh huaihawtte hian Dan Ryan Expressway chu minute 10 chung an dang a, New York-ah chuan Times Square-ah hun eng emaw chen lirthei an dang bawk. New York Police Department chuan nawrh huaihawt zinga mi 10 chuang man a nih thu a sawi. Minnesota-a St Paul-ah mi sang chuang zet chu governor chenna kawtah an punghawm a, tualthattu police-te hrem ngei an phut thu an aupui. Minnesota Governor Mark Dayton chuan mipuite chu inthunun tura ngenin, tualthahna thlen dan chu chhui chian mek a nih thu a hrilh.

David Brown chuan Dallas-a kawngzawh huaihawt lai hian zan dar 8.45 velah sniper-te hian chunglam aṭangin police officer-te hi an rawn kap a, mipui pungkhawm pawh chiaiin an tlanchhe darh niin a sawi.