Taiwan ramah thlipui tleh

Thlipui, super typhoon Nepartak chu nimin zing khan Taiwan ramah a tleh a, ruah nasa takin a sur zui bawk.

Thlipui tleh leh ruahsur nasa avangin venthawn thilah mi 9,000 vel chu hmun him lamah sawnchhuah an ni. Syper typhoon Nepartak hian nimin zing khan zing dar 6 rik hma deuh khan darkar khata km 234 vela chakin an ram khawchhak lam, Taitung county a nuai a, thil a tichhe nasa hle.

Thlipui tleh vang hian chhungkaw sing tel chu power supply nei loin an awm. Sorkar chuan thlipui tleh vang hian financial market,school leh office-te pawh nimin atan khan a khartir vek a ni. Domestic flight leh international flight pawh a khaihhlak phah hle.

Taiwan cnetral news agency chuan thlipui tlehin chhiatna a thlen kaihhnawihah mi 69 in hliam an tuar niin a sawi a, an zinga pakhat chu a dinhmun a ṭha lo hle nia sawi a ni bawk. He thlipui hian Taiwan aṭang hmarthlan lam a pan leh a, vawiin hian China ram a thlen rin a ni.

Nikum khan super typhoon Dujuan tleh vangin Taiwan-ah hian mi pathum an thi a, mi 300 chuangin hliam an tuar a, thli tleh hian thil tam tak a tichhe bawk. Kum 2009 khan typhoon Morakot tleh vang hian mi 600 chuang an lo thi tawh bawk a ni.