Hmeichhe pahnihin Britain PM chuh dawn

Britain Prime Minister David Cameron-a thlaktu tur inchuhnaah candidate pahnih chauh an awm tawh a, hmeichhia ve ve an ni.

David Cameron-an PM a nihna aṭanga a ban tur thu a puan hnuah, amah thlak tura an party Conservative Party hruaitu dinhmun chuh tum mi panga an awm a, mahse parliament member-ten an party hruaitu nih tuma chuhtu zinga duh an thlanaah a vote hmu sang pahnih, Home Secretary Theresa May-i leh Energy and Climate Change Minister Andrea Leadsom-i te chuan he dinhmun hi an chuh thei dawn a ni. MP-ten vote an thlakah May hian vote 199 hmuin, Leadsom hian vote 84 a hmu.

Ram chhung hmun hrang hrangah Conservative Party member-ten an pahnih aṭang hian party hruaitu tur leh Prime Minister thar tur hi an thlang dawn a, September 9 ah result puan a ni ang. May-i hi a dinhmun a la ṭha zawk a ni. A tu zawk pawh tling se, Britain hian Margareth Thatcher-i hnuah a vawikhatna atan hmeichhe prime minister a neih leh dawn a ni.

Theresa May-i hi October thla hian kum 60 a tling dawn a, Oxford University aṭanga zirchhuak niin, Britain chanchina home secretary dinhmun chelh rei thei ber a ni. Politics a luhchilh hmain Bank of England-ah a thawk ṭhin. Kum 1997 khan Maidenhead aṭangin Conservative MP atan thlantlin a ni.

Leadsom hi kum 53 mi a nia, girls' grammar school-ah kalin, Warwick University-ah poltical science a zir chhunzawm a ni. A nu, hmeithaiin dinhmun hniam tak aṭanga a enkawl a ni a, politics a khelh hma hian City of London leh Barclays-ahte investment banker hna a thawk ṭhin. Kum 2010 khan South Northamtonshire aṭangin a vawikhatna atan MP-ah thlan tlin a ni.