NATO-in MENA ramte thlawhtheihna a pe dawn

NATO chuan Middle Eastern and North African (MENA) ram sipaite thuam chakna turin sur≠veil≠lance thlawhtheihna pek a remti.

NATO Secretary-General Jens Stolteberg chuan NATO ram hruaitute chuan Mediterranean Sea-ah naval mission thar kalpui an remtih thu a sawi a, Afghanistan-a sipai a dahte pawh dah ngheh zel a, kum 2020 thlenga Afghan security force-te ṭanpuina sum pek a remti bawk niin a sawi. US chuan Aghan force puihna atan hian kum khatah dollar tluklehdingawn 3.5 pek a lo tiam tawh bawk a ni.

Warsaw-a NATO summit hmannaah, tun Inrinni-ah khan Stoltenberg chuan an thawhpui ramte thuam chak an tum thu hi a sawi a ni. Africa leh Middle East ramah mi sang tel chu Islamic State (IS) leh firfiak pawl dangte avangin chenna nei lo leh ṭanpui ngaiin an awm niin a sawi. NATO chuan IS firfiak nena inbei mek, Iraq armed force-te chu training a pek tur thu a sawi bawk.

NATO hian Tunisia ramah intelligence centre din tumin a bei mek bawk a, he ram hi IS hoin mi thar an lakluhna hmunpui atana an hman pakhat a ni a, hei vang hian Tunisia special operation force-te chu a theih anga thuam chak an tum a ni.

US President Barack Obama leh NATO ram 27 hruaitute chuan a thuphungin Syria leh Iraq rama IS laka beihpui thlak mektu, US kaihhruai ṭangrual ramte puihna atan surveillance thlawhtheihna pek an remti bawk.

Stoltenberg chuan NATO chuan European Union-in Europe rama raltlan tam tak an luh denchhena mi ṭhenkhatin mihringa sumdawnna an kalpui mek dang tura a beihnaah pawh a puih tur thu a sawi. Hei bakah hian Jordan ram nena an thawhdunna pawh a tilian dawn a, Libya ram sorkar thar policy duanna turah pawh puih a tum bawk a ni.