Japan upper house member tur thlang

Japan Parliament Upper House, House of Councillor member thar tur chu nimin khan an thlang.

Upper House-ah hian member 242 an awm a, member zinga a zahve hi kum thum danah thlan ṭhin a ni. Kumin inthlanah hian candidate 389 an awm.

Prime Minister Shin≠zo Abe-a party, Liberal Demo≠cratic Party (LDP) leh a thawhpui, Komeito Party bakah party tenau dang pahihte chuan upper house-a two-third majority nei turin nimina inthlan neihnaah hian seat 78 an lak phak a ngai dawn a ni.

Rorellai lam chuan PM economic policy, 'Abe≠nomic' tia sawi chu chak zawka kalpui an tiam a, PM Abe pawhin a policy thar hi Japan mipui zawng zawngin an chhawr theih tura tihlawhtlin a tiam bawk.

Hetihlai hian sorkar policy dan tumin, eptu party liante chuan thawhhona ṭha zawk an siam a, constituency ṭhenkhatah chuan joint candidate te an siam a ni. Eptu party, Democratic Party hruaitu Katsuya Okada chuan PM-in chhiah tihsanna tur thla 18 atana a tihkhawtlai leh chuan sorkar economic policy fuh tawk lohzia a tilang a ni, a ti. Hei bakah hian security law thar siam chu a sawisel bawk.

Upper House inthlan buatsaih hma hian Japan chuan vote nei thei chin hi km 20 aṭangin kum 18 ah a tihniam a, hei vang hian vote nei hi mi maktaduai 2.4 velin an pun phah a ni. Zan dar 8 thleng vote thlak hun hawn a ni a, vawiin hian result puan nghal a ni ang.