US-in Israel PM thusawi a sawisel
Israel Prime Minister Benjamin-a'n Thawhlehnia an ram inthlanpui neih nia Arab-Israeli voter chungchanga a thusawi dan chu US chuan a sawisel. Israel Parliament inthlan neih zawh takah Netanyahu-a party Likud Party hian party malin seat a la hnem ber.
Vote thlak ni khan Netanyahu hian a Facebook page-a video a dahah, Arab voter tam tak vote thlak tura an chhuah thu a sawi a, an rama right-wing sorkar a din chhunzawm zel theihna turin amah ṭantute chu vote thlak ṭheuh tura sawmin, Likud party leh eptu pawl, Zionist Union inkara inthlauhna an tihnep a ngai dawn a ni, a ti. Netanyahu hian Zionist Union hruaitute chu Palestinian state din tum thlawpah leh, East Jerusalem pawh Palestinian te khawpui atana pek remtiah a lo puh tawh a ni.
US chuan Israel PM thusawi dan chu democracy hlutna ngaihnepna a ni tiin, democracy chu US leh Israel thlunzawmtu pawimawh tak a nih thu a sawi. Zionist Union hruaitu, Shelly Yachimovich pawhin Netanyahu thusawi chu chi inthliarna a ni, a ti bawk.
White House Press Secretary Josh Earnest chuan US hian Israel leh Palestinian ram dinna tur chu a la thlawp reng tih a sawi a, ram pahnihte inkara harsatna awm chinfelna ṭha ber chu Palestinian state din nia a ngaih thu a sawi.
Hetihlai hian PM Netanyahu hian inthlan hmaa thu a sawiah, Prime Minister ni thei tura an party chu thlan tlin a nih leh chuan Palestinian state din a remti dawn lo a, Jerusalem khawpui ṭhendarh pawh a phal dawn lo tih a lo sawi tawh a ni.
Parliament inthlan result hi hriat ni tawh mah se official chuan puan a la ni lo. Inthlanah hian seat 120 awmna parliament-ah Likud Party hian seat 30 a la a, inthlan hmaa chak ber tura ngaih eptu pawl Zionist Union chuan seat 24 chauh a la pha thung.
Likud party hian party malin sorkarna a siam thei dawn lo a, hei vang hian ṭangrual sorkar siampui turin party dangte a dawr a ngai dawn a ni. Netanyahu chuan inthlan hma khan an party an chak zo lo a nih pawhin Zionist Union chu ṭangrual sorkar an siampui dawn lo tih a lo sawi tawh a, hetihlai hian party mala seat la hnem pathumna, Joint Arab List chuan sorkar siamtu lamah tel an tum loh thu an sawi tawh bawk.