Tunisia museum beihnaah IS inrawlh ring

Tunisia khawpui, Tunis-a National Bardo Museum chu Nilaini chawhnu lam khan sipai uniform-a inthuam te'n silai nen an bei a, ramdang mi khualzin 17 leh Tunisia mi pahnih an that. Musuem beitu zinga pa­hnih chu security force-te'n an kaphlum bawk.

Prime Minister Habib Essid chuan museum beitute hi tute nge tih hriatchian an la ni lo a, an zinga mi 2-3 vel chu zawn mek an la ni, a ti. PM chuan ramdang mi khualzin an thahte hi Italy, Germany, Poland leh Spain mite an nih thu a sawi a, mi 17 an thah bakah midang 22 in hliam an tuar bawk niin a sawi.

Bardo Museum hi Tunisia ram thil hlui leh hlu tak tak dahkhawmna hmun lar tak a ni a, Rome leh Greece hmanlai thil hlu te pawh eng emaw zat an dah bawk. Pawikhawihtute hi hriat chian la ni lo mah se, Islamic State (IS) firfiakte an inrawlh rin a ni.

Tunisia rama mi 3,000 vel chuan Iraq leh Syria-ah IS pawl hi an zawm mek niin thuneitute chuan an sawi a, heng mite hi an ramah rawn kirin, pawikhawihna an thlen an hlauhthawn thu an sawi.