Typhoon Shan Shan-in Japan a nuai: Mi maktaduai chuang insawn chhuak turin hrilh

Typhoon Shan Shan chuan nimin khan Japan chhimthlang lam, Kyushu thliarkar chu a nuai a, thli na tleh leh ruah tam tak sur vangin mi maktaduai chuang chu hmun him lama insawnchhuak tura tih an ni. Power supply a khaihlak avangin thlawhtheihna service a tikhaihlak a, factory tam tak an inkhar bawk.

Thlipui tlehin chhiatna a thlenah mi pathum an thi a, hliam tuar eng emaw zat an awm. Typhoon hi second khata meter 50 (180 km per hour/112mph) a chakin a tleh a, nimin chawhnu lam khan Nagasaki Prefecture-a Unzen khawpui a nuai a, heta ṭang hian hmar lam chu 15km per hour-a chakin a pan niin weather agency chuan a tarlang.

Nimin chawhnu thleng khan prefecture pasarih huamchhunga chenna in 230,000 chuan power supply an nei lo a, hetih lai hian thlipui tleh hian Satsumasedai khawpuia awm, Sendai Nuclear Power Plan erawh a nghawng chhe lo nia sawi a ni.

Chief cabinet secretary Yoshimasa Hayashi chuan news conference neiin, thlipui tleh vang hian mi pathum an thih bakah, chin hriat lohin mi pakhat a awm tih a sawi. Disaster management agency chuan hliam tuar mi 45 an awm thu a sawi ve bawk.

Kyushu-ah hian thlipui hi a la tleh chhunzawm dawn nia sawi a ni a, hemi hnu hian khawchhak lam, Tokyo pawh telin a pan rin a nih thu weather agency chuan a tarlang. Typhoon tleh vang hian mi maktaduai 5.2 chuangchu hmun himlam pan turin thuneitu lam chuan an hriattir tawh a ni.

Airlines ANA Holdings leh Japan Airlines te pawhin thlawhtheihna thlawk chhuak tur 800 chuang chu an ti tawp lailawk rih a, train services pawh Kyushu hmun eng emaw zat ah tih tawp rih niin, Bus leh ferry service engemawzat pawh din tir rih an nih thu Transport Ministry chuan an tarlang.