'Taiwan hi China ta a ni' - China

US president Joe Biden leh China president Xi Jinping-te inbiakna neih tur chungchang sawidunin, Nilaini khan Communist Party Central Foreign Affairs Commission Office director Wang Yi leh US national security adviser Jake Sullivan-te chu Beijing-ah an inhmu. He hunah hian Wang chuan Taiwan chu China ta a nih thu a sawi nawn leh.

Meeting-ah hian Wang chuan Taiwan-in independence a tum chu boruak ralmuang tiderthawng thei a ni tih sawiin, US chu Taiwan hnena ralthuam a pek ṭhin titawp tur leh, China inpumkhatna kalpuina chu thlawp turin a ti a ni.

Wang chuan China-US inlaichinna ṭha tak awm tur chuan ang khata an in entawn a ngai a ni, a ti bawk. US-in China bungruaa tariff a siam danah an lawm lo tih a sawi bawk a, hemi rual hian China chuan US nena inzawmna nghet ṭha siam chu a duh reng tih a sawi. Sullivan leh Wang Yi hi thla 16 chhunga ṭum li an inhmuhna a ni.

Bejing-a meeting an neihah hian hruaitu pahnihte chuan hun remchangah Indo-Pacific region-a an military theater commander-te tan video call buatsaih an remti a, hei hi Taiwan Strait-a buaina chhuak tur venna atana an tih a ni. White House chuan inbiakna hi neih thuai a ni dawn tih a sawi.