IDF-in West Bank-ah Hamas firfiak 10 kaphlum

Israel Defence Force (IDF) chuan Nilaini zan khan West Bank-ah beihpui thlakin, Hamas firfiak 10 an that a, hei hi tun hnaia West Bank-a beihpui thlak lian tham an neih zinga mi a ni. Jenin khawpui chu tlawhpawh theih lohin an dang bawk.

Israel military thupuangtu, Lt Col. Nadav Shoshani chuan Hamas firfiak chakna hmun ṭhin, Jenin-ah chuan sipai eng emaw zat an lut a, hei bakah Tulkarem leh Al-Faraa refugee camp pawh an lut bawk tih a sawi. Tulkarem-a airstrike an neihah firfiak pathum leh, Al-Faraa-ah firfiak pali an thi a, mi dang panga an man tih a sawi. Hetih lai hian Palestinian official-te chuan Israel sipaiten Jenin an beihnaah Palestinian mi pali an thi tih an sawi ve bawk. Hamas pawhin an fighter 10-te chu West Bank-a thah an ni tih an puang a ni.

Jenin governor, Kamal Abu al-rub chuan Israel sipaite chuan an khawpui chu hual vekin, luh leh chhuahna hmunte an dang vek tih Palestinian radio-ah a sawi. Palestinian Health Ministry chuan Israel sipaite hian hospital panna kawng an dan bakah, medical facility dangte pawh an hual vek niin a sawi. Hetih lai hian Shoshani chuan firfiakte hian inhumhimna atan hospital an pan tur chu an veng niin a sawi thung.