Israel-in Juda-te in sakna tur sum pawm

Israel sorkar chuan West Bank-a Kiryat Arba leh Hebron-a Juda mite chenna tur in sak nana dollar maktaduai 13 ruahman chu a pawm.

He thutlukna hi Pathianni-a Prime Minister Benjamin Neta≠nyahu-a kaihhruai cabinet meeting-a an siam a ni.

In sakna tur sum pek tur hi kum thum chhung atana tih a ni a, in sakna bakah social, education leh security service atante hman a ni bawk ang. Hemi atana sum hi a kaihhnawih ministry hrang hrang aṭangin budget siam a ni dawn a ni.

West Bank-a khaw lian ber, Hebron bulah Kiryat Arba hi a awm a, he hmunah hian Juda-te chenna in eng emaw zat sak a ni tawh. Juda-te chenna hi Palestinian ram laili laia siam a ni a, Israel sipai sang telin an veng a ni. Hetihlai hian Hebron khawpuia Palestinian chengte erawh khawpui chhung leh a chhehvelah Israel sipaiten checkpoint eng emaw zat an siam avangin a zalen lo hle thung.

Nikum October thla aṭang khan Palestinian ram chhung leh Israrel-ah Palestinian miten Israel mi an bei fo a, an kut tuarin Israel mi 34 an thi tawh a, hetihlai hian pawikhawihtu nia hriat Palestinian mi 214 vel chu Israel security force-te kutah an thi tawh bawk.

Israel-in a ram luah, West Bank-a Juda-te chenna in a sak sak ṭhin chu international law palzutna nia sawi a ni a, Palestinian bakah ram hrang hrang pawhin an sawisel fo a ni. Hei hian Israel-Palestinian inremna kawng zawnga inbiakna neih pawh a tih bahlah phah a ni. Mahse Israel hian Juda-te chenna in a sak belh reng thung.

Kum 2009 leh 2014 inkar khan West Bank leh East Jerusalem-a Juda te chenna tur in sak hi 23% in tihpun a ni a, heng hmunah hian Juda mi nuai nga chuang zet an khawsa tawh a ni.

United States, European Union leh international community hrang hrang chuan Palestinian rama in sak chu tihtawp turin Israel sorkar an nawr. Mahse Netanyahu chuan an nawrna chu an pawm loh thu a sawi a, Jerusalem leh Malle Adumin-a in sak chu remna leh muanna zawnga an hmalakna tibahlahtu a nih loh thu a sawi.